樓市出更：屯門細價樓撈底難

近月樓價從高位滑落，相信唔少準買家都儲定彈藥，諗住200萬元細價盤湧現時撈貨，不過有代理老友畀咗份數據劉Sir參考，細價盤供應集中地嘅屯門區，原來今年到依家200萬元以下放盤一直按月遞減，八月份仲得番1,100個左右，比起年初唔見咗一半。佢估計呢類細價盤源應該唔會再點跌，嚟緊橫行居多。

其實市況差咗，按道理低於200萬元放盤理應增加，到底係業主真係咁硬淨，定係驚賣咗買唔番？姑勿論原因為何，數據係唔會呃人。劉Sir嘅代理老友已經扎根喺屯門區好一段日子，佢提供嘅祥益地產數據你都咪話唔可信，睇番今個月區內放盤情況，原來叫價低過200萬元嘅只係得番1,100個左右，比起上個月少咗8.3%。

有關數據仲提到，今年屯門區200萬元細價放盤愈嚟愈少，由一月份大概2,300個，逐個月減少到依家約1,100個，即係經已蒸發咗足足52.2%；再係咁少落去，上車客仲使入市嘅？呢位代理老友就向大家派定心丸，佢認為按照依家市況，呢類放盤頂多保持橫行，唔會再減少咁話喎。

近排市場又真係開始有某啲屋苑，成交價跌番落200萬元樓下，好似新界大型藍籌盤沙田第一城，早幾日就有個面積395方呎極低層單位，買家只係用咗約191.5萬元就買到，係屋苑最近半年首次有單位做價跌穿200萬元。

大埔中心賣195萬少見

又好似大埔中心一個面積423方呎單位成交價195萬元，亦係近三個月首見，其實想買樓不妨耐心等多一排，相信最終都可以成功上車做業主嘅。