Fundman睇市：中國海外隨時有驚喜

港股短短七日，高低位相差近4,000點，史提芬都後悔無趁盛夏天氣正好，去吓旅行散散心，即使筆者手上大部分股票，已轉到高防守收息股，看着港股恐慌戰勝理智，期指一個下午來回地獄與天堂，真係冇乜嘢可以做。

昨日三點前市場有消息傳美國會在開市前公布QE3細節，期指由19,400點附近挾到最高見20,113點，直到三點半左右，有傳聞一個亞洲股票基金接到歐洲客戶大額贖回要求，挾倉立即如曇花一現，期指回到起步點19,200點附近，一個下午期指上落超過千五點，消息對股市波動的影響，認真誇張到極。

南韓帶頭限制沽空

或者會問：到底跌夠未？用恒指250日平均線（目前在22,873點）低多少，量度市底夠恐慌未！恒指尋日跌1,159點，收19,330點，較這長期趨勢線低15.48%，睇番幾次大時代，○八年雷曼出事，恒指低250日線53.4%，○三年沙士時低14.9%，○一年科網股爆煲時最多低35.2%，九七年金融風暴幾個浪底之中，最多較250日線低38.8%，比較之下，似乎今日港股仲未夠恐怖。

不過，要先旨聲明，九七及○八年特別跌得厲害，因為港股由相對高位上跳崖，兩次股市的市帳率都由3.3倍以上的高峰起步，相比之下，一○年港股高位只係2.2倍市帳率（歷史平均係1.95倍），相信今次跌市殺傷力，未必有過往幾次咁勁，尋日南韓交易所收市證實，限制不准沽空三個月，會唔會令亞洲股市起到帶頭作用，不妨拭目以待。

以為滙控（00005）近幾日跌得多咩？有留意外圍銀行股的，應會感受到大笨象相對經已跌得「溫和」，美國三大銀行之一美銀美林，八月一日至今，股價跌三分之一，市值唔見330億美元，華爾街怕這間主要樓按機構的不良貸款，會因為美國經濟低處未算低而飆升，市場正擔心美銀美林需要大規模補充資本，手上近千億元禁售期快屆滿的建行（00939），會否賤價批出街，看官們務必留意事態發展。

16元樓下具吸引力

內房股尋日低位支持唔錯，估計同市場估內地通脹短期見頂，人行可能因應外圍市況，第四季鬆手有關。內房股龍頭中國海外（00688），股價由即市低位15.14元，一度倒升0.34元去到16.76元，中午前成績表，賺68.4億元，升35%，貼近大行估計47億元至71.6億元上限，較令人驚喜的，毛利由40%升至43%，多得近八成銷售成交價每方米1.59萬元，較預期為高，資產淨值升12%至7.51元。

集團上半年售樓收入522.3億元，達全年目標800億元的65.2%，在中央嚴打樓下之下，有此佳績值得股東欣喜，內房股之中，筆者依然較看好土儲量充裕的恒大地產（03333），以及毛利及售樓表現屢見驚喜的中國海外，趁市況波動，16元樓下中長線有相當吸引力。