股海實戰： 一拖不妨人棄我取

超級大國淪為落水狗，美國世紀降級事件引發軒然大波，美股前晚大插逾六百點，拖累港股昨日大幅低開逾千點，最低見過18,868點。阿莊都冇諗過開口中，尋日先講完等19,000點才入市，點知瞓醒一覺就到！

執筆時尚未知道今日凌晨聯儲局會議結果以及美股表現，純睇走勢，短期股市仍會波動，報復式反彈最多到21,000至21,500點，之後會喺20,000點水平橫行，甚至係再試低位支持，若全球確認再次進入衰退期，緊隨嘅跌浪可能要一、兩年時間，恒指最後防守下調至16,000點水平。

尋日中國公布七月份CPI同比增幅略高於市場預期，估計短期內中國不會加息，但放鬆宏調政策嘅空間就好有限。A股尋日先跌後回穩，係咪有國家隊入場支持不得而知，但講到尾中國嘅量化寬鬆時代已結束，只要A股能夠跑贏外圍已算係咁。

尋日阿莊專登落銀行聽吓散戶心聲，最多人講嘅係「點算好」、「冇眼睇」、「同佢鬥長命」、「大閘蟹提早上市」等等。事實上，呢三個交易日港股每日跌成千點，口淡淡亦可予理解。總之，阿莊奉勸各位中線策略以保守為主，選股宜重業務以內地市場為主嘅中資股，盡量避開歐、美市場風險。

講番個股，朝早見到推介嘅粵投（00270）真係落到建議上車位，遂以平均價4.15元買咗15萬股，但尾市見大市再掉頭回落，所以喺4.45元食胡，獲利4.5萬元，當係補補身。

憧憬中期業績對辦

另一隻可關注嘅係第一拖拉機（00038），公司係農機補貼政策嘅受惠企業，本周五將宣布中期業績，相信盈利可保持穩定增長，現價往績市盈率十一倍，估值唔貴，可留意中報會否交代計劃年內建成投產嘅大功率拖拉機生產線進度。

若然外圍經濟繼續轉差，對中國而言，透過刺激內需保持內地經濟穩定局面顯得更加重要，持續推動農業發展、確保農產穩增，類似一拖呢類農業股亦有避險概念。近月該股股價由高位調整幅度達三成，7至8元係一個重要支持區，若中報對辦，可以人棄我取。