豪租新樓齋住工人

近幾年喺按息低同紅簿仔息低情況下，唔少人鍾意買磚頭保值，直接令到入伙新盤嘅放租盤源相當充裕，租金自然有得傾，劉Sir知道有僱主近期見東九龍峻弦有業主願意減租，所以租咗個一房單位畀女傭居住，自己又可以享用屋苑嘅豪華會所，可謂一舉兩得。

世紀21富山地產馮靜宜話，啱啱租出嘅5座高層單位，面積538方呎，以一房兩廳間隔，原業主最初開價月租1.3萬元，最近減至1.1萬元租出，減幅超過一成半，呎租約20元。

個租客本身住喺同系嘅太子道東譽．港灣，因見峻弦會所極度華麗，而且設備齊全，加上為方便女傭照顧喺附近上學嘅小孩，所以就決定租用單位畀女傭居住，而自己就可以享用會所嘅各項華麗設施。

舊樓漲租 新盤抵住

其實，該名僱主豪租新樓畀女傭居住，劉Sir亦可以理解，事關近年住宅租金飛升，現時峻弦同區嘅單幢式舊樓，企理啲嘅單位月租都要由7,000至8,000元起，以單位質素嚟講可謂「貴得驚人」。

相比之下，新盤月租只係萬零蚊，就可以用到約5億元打造嘅私人會所，其實除笨有精。

馮靜宜話，現時峻弦租盤放盤量多，其中以面積918至1,105方呎嘅三房單位最受歡迎，呎租約19至20元，依家部分業主議價空間去到5至10%。

講開租金，其實近排整體租金都冇咩受樓市措施影響，依然係咁升，好似藍田麗港城現時部分內園景單位呎租去到約20元。

最近屋苑一個8座中層F室，面積639方呎，單位坐向東南，享內園景，以月租1.28萬元租出，租金表現唔錯。