鴻興任澤明 牢記父訓
鴻興印刷（00450）今年創辦六十周年，今個月初任氏家族又正式重登其印刷王國第一大股東寶座，由任澤明做番公司話事人，都算重振任家威名，難怪任澤明在最新年報表現得咁感慨萬分。
「不會打算一世窮」
最令呢位新掌門人神傷嘅係，老父任昌洪已於年內與世長辭，佢喺重掌話事權後嘅首份主席報告之中，引用了先父生前口頭禪自我激勵，仲話希望先父呢種目光遠大嘅精神長存不息。
任昌洪一句「吃不窮，穿不窮，不會打算一世窮。」被奉為鴻興今時今日成就嘅經營理念同智慧，尤其傳神，甚至可以話係鴻興呢三年嘅精神寫照。自○八年炒燶金融衍生工具，焗住由「紅籌之父」梁伯韜嘅私募基金CVC入主鴻興做最大股東。
直到今年四月，CVC轉讓29.91%股權畀日本造紙及包裝物料製造商聯合株式會社，任澤明獲提升為公司最高領導人。