Fundman睇市：中電趁平買些少收息

上周五美股終在好過預期的就業數據下止跌，可惜華爾街未來得及慶祝，意想不到的是評級機構標準普爾，褫奪美國國債3A評級，美債首次失去最高評級，到底對金融市場衝擊有多大，世上無人會知，但可以話畀大家知，今年時值「九一一」事件十周年，莫非真係十年一次金融大災難咁邪門。

今年四月，標普率先將美債前景由平穩轉到負面，筆者認為3A不保，基本上是估計之中，只係出現的時間是意料之外。美國國會在調高國債上限的鬧劇，毫無疑問係整件事的催化劑。

民主共和兩黨，儘管在死線前拆彈剪咗電線，但連日來大行策略師，以至美國財經頻道財金名嘴，異口同聲對協議內容評價差劣，民主黨為免做歷史罪人，連番妥協，就連一些布殊時代的稅務寬免都無得取消，未能透過加稅增加財政收入，幾乎百分百透過削減政府開支，去達到共和黨要求的滅赤目標，對今時今日極需要政府增加開支刺激經濟的美國，等於判了經濟復甦死刑。

美債仍難有取代品

全球央行儲備貨幣資產，美元佔近六成，要放棄美債，可能同時要想想哪種債券可以取替其地步，兼有足夠流通量讓各國央行大舉資產轉投，答案係：無！至少我哋地球人暫時無月球債券可買。不妨睇番四月中，美國債務評級展望降至負面以來，美國十年債券不跌反升，孳息率由接近3.4厘，跌到上星期2.5厘都一度失守，借錢畀個窮光蛋，十年收2.5厘都有人爭住要借？事實是，歐盟搞掂希臘、意大利及西班牙的債務遺約風險持續攀升。歐盟大哥德法即使家當再厚，但驚見窮兄弟眾多，十個茶壺六個蓋，無條件援助意大利國內反對之聲不少，投資者面對全球兩大經濟體鬥衰，仲係傾向相信船堅炮利的美國多啲。

上星期五港股曾跌過千點，收市跌938點報20,946點，是一○年九月以來首次收低於21,000點樓下，期指低水達205點，反映基金經理為手上現貨對沖，不惜花上1%保險金，求個安心。風險溢價再升，恐慌戰勝理智，港股今日早市再低開2至3%，唔令人意外，筆者建議大家綁好安全帶，但卻絕唔係加入非理性拋售的時機。

急跌提供入市機會

美元零息期，或許比大部分人預料更長，筆者最近推薦的幾隻高息股，短期都累積唔小升幅，大行的估值模型一般會以美國國債風險加上他們心目中的一個風險溢價，計算這類高息股的估值，會否因為市場兵荒馬亂，出現急跌，不妨留意，但筆者認為這反而提供機會畀厭倦風險的股民，買貨收息之用，包括和電香港（00215）、長建（01038）及中電（00002）。上星期跌過千點時，中電一度跌至67.85元，比上星期高位73.05元，回落接近7.1%，現價69.2元，接近大行綜合的一年目標價69.17元，假如股價跌至65.6元水平，一二年預計息率會去返4厘水平，早前錯過咗，今次似乎再有機會了。