股海實戰：英皇國際揸得安心

受歐債危機擴散，以及全球經濟再次步入衰退，環球魚缸大震盪，恒指上周五曾急挫逾千點，美股當晚一度在非農業就業數據略勝預期下反撲，可惜人心惶恐，市場缺乏承接，結果道指僅彈60點，收市後標普正式宣布將美國主權評級由AAA調低至AA+，將市場嘅恐慌情緒推向極點，相信今日全球股市場會出現大混亂，傾巢之下，豈有完卵？

呢兩日投資者有得震冇得瞓，今早亞洲區股市極大機會出現恐慌性拋售，加上因應市場風險溢價急升，衍生工具引伸波幅好肯定會顯著擴大，將令市場更加波動，要做好心理準備，港股要再硬食一次洗倉潮。短線恒指插穿20,000點機會頗大，呢浪最差係要見去年低位18,971點。

阿莊上周五以均價1.47元、12.6元、1.3元分別沽出新礦（01231）、光大控股（00165）及天津港發展（03382），共套現132萬元。中國南車（01766）宣布中期純利增85%至20.44億元人民幣，可惜遇上大冧市，若然今日股價冇奇迹，都係要搵位落車。

現金充足應對動盪

本周中國及美國均有多項經濟數據公布，股海驚濤駭浪，即使想搵個股避險，亦宜小心挑選。從大折讓股入手，英皇國際（00163）上周五股價受跌市拖累，一度低見250日線1.6元，收報1.65元，跌2.94%，咁嘅跌幅算係託賴，皆因其股價較資產淨值折讓高達54%，息率6厘，咁嘅估值已經夠晒平！再講公司從事嘅物業發展及投資，以及酒店營運業務，與美國評級事件影響冇咩大關係，最近更落實出售九龍灣物業，套現達3.7億元，加埋截至三月底止手頭現金有10億元，有足夠財政實力應對金融市場大動盪。

近年大股東楊受成不斷增持股份，足見信心十足，若股價受跌市影響而下跌，相信大股東會再出手增持。以目前大股東持股量已達72%，扣埋基金持貨，隻股街貨唔多，唔使驚被對沖基金搞事，揸得安心。