魚缸Blogger：申洲國際相對硬淨

上周五全球股市大冧檔，其中恒指下挫938點至20,946點。屋漏偏逢連夜雨，花旗國三條A嘅金漆招牌不保，睇嚟今日恒指無可避免要向下插多棍，不過，恒指14日RSI已踏入超賣區，加上20,000至20,300點係重要支持，假若今日跌定，超短線操作嘅值博率將開始浮現。

人心虛怯，上周五升幅榜嘅「冧把」只有38隻，46隻恒指成分股更全軍覆沒，當下具投資價值又不妨伺機吸納嘅股份實在寥寥可數。

銳意進軍內地市場

申洲國際（02313）主要以代工（OEM）方式替客戶生產針織品，主要客戶為Nike、Adidas、UNIQLO等國際知名品牌，而近月棉花價格回落以及積極喺上半年囤積棉花，亦有助集團盈利表現。

申洲近日發盈喜，指中期業績嘅淨利潤有顯著增長。雖然近日歐美賴債、雙底衰退嘅聲音不絕於耳，但由於集團銳意進軍內地市場，而內地又力谷內需保增長，所以作為行業龍頭嘅申洲仍可受惠。

申洲上周五喺盈喜帶動下股價表現大勇，升1.29%，如果能夠守穩50日線10.74元嘅話，醞釀破頂形態仍未改變，首站目標12.5元，10.7元止蝕。

申洲國際（02313）

目標價：12.5元 止蝕價：10.7元