高價買樓疑似爛尾

樓市「瘋癲」，好多人都上唔到車，到政府多次出招，個市先稍為收斂，上個禮拜遇到歐債危機引發港股暴瀉近千點，大藍籌屋苑業主即時「腳軟」大幅劈價，跟住標普又降低美國評級，睇嚟今日個股市都危危乎，雖然樓價唔會好似股市咁出現恐慌性拋售，但短期並不樂觀。劉Sir縱橫地產界多年，適逢有機會喺呢個樓市動盪日子，同大家分享一下對樓市嘅睇法。

去年政府推出額外印花稅撒手鐧，但都無助壓抑飆升的樓價，唔少藍籌屋苑都出現歷史性創新高價成交。不過，隨着政府出招收緊按揭，投資者缺水情況下，高價搶貨成交顯著減少。

有經紀老友同劉Sir講，發現個別喺政府六月出招前超高價售出的單位，到依家都未見完成交易，相信有機會出現變數。

第一城走得快執身彩

其中某個市區藍籌屋苑單位，喺出招前由一名內地客以創歷來新高價購入，單位原本應該喺七月左右完成交易，點知到依家未見有任何聲氣；劉Sir覺得樓市原本都唔會因為政府再出招而崩圍，最多係靜一排，又會再反彈。不過，依家股市暴跌，再加上美國被降評級，環球經濟相信會被拖累向下，樓市前景並不樂觀，早前以理想價購入單位的買家，有機會見市況不穩而撻訂再等待入市時機。

上個禮拜股市未冧之前，唔少業主都主動將單位劈價求售，最引起市場話題嘅成交，係沙田第一城一個極低層395呎無窗台單位，業主原本劈價20萬元，以190萬賣出，成為二月以來屋苑首個破200萬成交。不過，「破底」消息傳出，即刻有買家主動聯絡業主，願意畀多10幾萬買個單位，業主諗咗兩日，決定賠訂，將單位以204萬元重售；有經紀老友同劉Sir講，個單位應該值210幾萬元，但係業主覺得麻煩拒絕再重售，喺依家市況嚟睇，可以話係執番身彩。