Fundman睇市： 南航趁整固買番啲

金融市場陷入一片慌亂，歐債危機升級，西班牙及意大利CDS前晚繼續抽升，國債孳息去到十四年高位，意大利股市好似坐過山車一樣，前晚開低3%、曾倒升1%，最後都跌1.5%，心臟弱些少恐怕都頂唔順。前晚美股一樣拋上拋落，道指開市跌1.5%，收市倒升0.25%，升幅唔大，但卻避過九連跌劣勢。

美國QE1、QE2狂印銀紙，經濟依然無大起色，龐大資金卻不斷湧入美元以外貨幣進行套息賺差價，非美元貨幣升值不絕，搞到全球政府極為頭痛，尤其像日本出口型經濟壓力愈來愈大。瑞士央行終於按捺不住，帶頭出招，推低瑞郎基準利率去到0至0.25厘，同美元睇齊，等資金唔好再湧入套息推高瑞郎。唔夠十二個鐘，地球另一邊日本央行出手干預，開動印鈔機大幅提高購買國債規模，圓匯兌美元急挫近3%。

高息貨幣繼續得寵

兩個央行話唔係夾埋都無人信，近期美國製造業放緩，GDP增長動力放緩，債王格羅斯堅持預測月底前聯儲局就要整個QE3出嚟，免得搞到雙底衰退，學日本經濟迷失十年，相信聯儲局到時即使唔用QE呢個名，措施內容都會係大同小異，都係超低息加埋水浸金融市場，避免美國CPI跌至負數，經濟到時神仙難救！不過，結果大致可以預期，美元要貶值避免通脹及資產價格在美國國土內出現。

今趟瑞士及日本央行半聯手派錢出街，正好畀機會大家，等高息貨幣回吐，繼續將更多港元轉換成澳紙、加紙定期存款，賺價兼賺息，從技術走勢，澳元兌美元回到1.04附近，美元兌加元升至0.99，可以換番啲外幣。

睇見港股走勢，認真唔開胃，無論結果港股係雙底抑或雙頂，好淡兩邊似乎都去到決勝時刻，淡友發功，借意大利財政告急，恒指在短短四個交易日，由22,808點高位隊到尋日最低見21,725點，累積已跌過千點，尋日收市報21,884點，跌107點，由八月期指收市隊到開巷，大低水179點，收21,705點，扣埋藍籌除息影響仍要低水127點，反映芬佬仲係傾向怕收市後歐美股市出問題，要為手上股票買個保險，沽定期指對沖。

油價回落如魚得水

歐美經濟雙底衰退風險增加，最直接影響的，非油價莫屬，紐約期油從兩星期前100美元樓上，輾轉跌到執筆時91.5美元。老實講，若非市場氣氛實在太差，相信幾隻中資航空股股價升勢，應該更凌厲。五、六月份民航搭運數字，都要比市場預期好，支持六月中航空股一輪急升，展望第三季是傳統內地航班旺季（尋日有消息指，整體民航載運率由上半年81.3%，到七月上旬突破85%水平），加上國際航油價格回落得夠合時，航空股短期、至少未來一兩個月可睇高一線。

眾多航空股中，以南航（01055）估值最平，市帳率大約1.1倍，比東航（00670）及國航（00753）的1.5至1.6倍有距離。早前股價由3.6元起步，升至5元開始橫行整固，近幾日跌市應跌唔跌，有條件挑戰今年高位5.31元樓上。