股海實戰：鉑陽炒味重新凝聚

隔晚美股一開市就走低，睇到都膽戰心驚，好彩之後慢慢回升，埋單報11,896點收市，倒升29點。其實，美股已經連跌八個交易日，吊頸都要抖吓氣，相信短期點都會彈下，但係後市點走，就好睇歐洲債務問題搞唔搞得掂，若然搞唔掂，相信淡友又有機會做個市落去。

美股反彈，港股跟隨高開，但好快就掉頭下跌，晏晝跌幅仲擴大至267點，尾段雖然有反彈，但埋單都跌107點，最後以21,884點收市，睇嚟喺市場人心惶惶之際，個市都好難有運行，睇格局點都要試吓21,500點呢啲位先。

金飾股終於回吐

阿莊話口未完金飾股係咪值得升咁多，點知尋日金飾股果然有回吐，六福（00590）同埋周生生（00116）分別跌3.37%及2.63%，至於英皇鐘錶（00887）跌幅就比較大，全日跌近7.9%，以1.62元收市，早排英皇鐘錶大股東楊受成頻頻在市場增持公司股份，近排已經停晒手腳，淨係買入同系嘅英皇國際（00163）同埋英皇酒店（00296），唔知楊生見股價回落咗，會唔會再次出手。

尋日阿莊睇好嘅華潤電力（00836），早段表現都好硬淨，個市跌佢都唔跟跌，走勢咁強，似乎有大戶力撐，所以阿莊跌市都忍唔住手以平均價15.44元買入5萬股，如果佢可以突破到16元關口，股價應該可以更上一層樓。

本地電訊商一二三，尋日正式開始推出四豬（4G）服務，唔知係咪有關係，兩隻上市電訊股和電香港（00215）同數碼通（00315），都做咗逆市奇葩，分別升3.1%及2.1%，收報2.96元及13.6元。早前和電份業績對辦，加埋管理層拍心口話要將盈利派息比率調高到七成五，吸引一眾好息之徒，大行亦因為咁陸續將目標價調高至3至3.3元。

本地電訊股有瞄頭

今時今日走到街上，唔難見到個個一機在手，上網、打機玩視像通訊，網絡公司流動數據用量與日俱增。早前有單新聞吸引阿莊興趣，係美國有電訊公司升級四豬服務時，同時取消固定月費無限上網收費，香港會唔會照辦煮碗？睇兩隻電訊股咁升法，可能性似乎唔能夠抹殺，到時股價隨時有大龍鳳。

五、六月時太陽能概念股跌到七個一皮，有趣係近期個市隊到暈，太陽能股反而有炒落後迹象，保利協鑫（03800）和興業太陽能（00750），都由七月初低位升番唔少，尋日收市前，見到隻鉑陽太陽能（00566）異動，大成交被掃高6.8%，報0.31元。

睇番股價由四月高位0.65元，去到近期0.3元水平橫行近一個月，公司去年因為太陽能業務貢獻浮現，賺11.85億元，今年預期市盈率約十倍，只要成交配合，炒番去上次高位阻力0.4至0.45元，唔係無可能。

戰報

明豐珠寶（00860）

短炒倉作者志強於七月二十九日推介明豐珠寶，股份昨日狂追落後，升逾一成再見全年高位，較推介日低位累升超過16%。

裕田中國（00313）

錢進本周一睇中裕田中國，果然搭上了快車，股份昨以全日高位0.193元收市，及時跟進都夠晒水位食胡，套現17%利潤袋袋平安。