魚缸Blogger：明豐珠寶 動力未減

歐美債務問題立立亂，日本加碼放水，而內地會否加息亦快有分曉，當前環球嘅經濟亂局，恐怕連股神都未能睇通睇透。尋日恒指繼續沉淪，收報21,884點，跌107點，可見好友反擊乏力，似乎底部支持下移至21,509點已成為市場共識。

早前唔識跌嘅財險（02328）同華晨（01114）就做咗英雄塚，分別大跌11同7%，睇嚟眼前嘅市況跟進落後嘅股份較實際。

獲基金大手增持

雖然明豐珠寶（00860）同樣做產銷珠寶鑽石產品，但今年以來嘅股價就唔多靚仔。其實集團中期業績唔錯，截至三月底止，上半年純利按年上升20.6%至4,973萬元，而且大計多多，除咗同亨得利（03389）合作，透過對方嘅零售網絡出售珠寶產品外，仲收購咗一個位於內蒙嘅金礦以穩定黃金原材料供應，同時收購埋一間喺內地為Gucci鐘錶做獨家分銷嘅公司，所以集團嘅基本因素一啲都唔曳。

尋日明豐喺獲L Capital Asia增持嘅消息刺激下急升一成，抽穿雙底頸線阻力，不妨博其「動L」持續，上車目標1.18元，止蝕0.98元。

明豐珠寶（00860）

目標價：1.18元 止蝕價：0.98元