Fundman睇市：兩電可等多陣先買

執筆時，未知美國國會調高國債上限結果，但按民主黨幾乎「咩都制」的態度，十居其九應可順利過關。

可是，華爾街股市顯然已把注意力，轉去基本經濟層面上面。周一，亞洲時段標普五百指數仲係威係勢，升近20點，前日美股收市居然可以倒跌，夠晒反高潮！一來係七月ISM製造業指數跌至50.9，遠差過市場預期的54.5，而早前公布的GDP數據，都發揮威力，過去三季美國GDP增長經修訂後得2.3%、0.4%及1.3%，可說是似有還無，失業率逐漸企穩9%樓上，年底前再見雙位數字絕不為奇。

今次民主黨為迫在眉睫的國債上限，退吓一步，退吓一步，削赤由兩成五來自加稅，變咗全數從削減政府開支達到目標，意味着美國政府再無彈藥，可以使錢去振興經濟，愈來愈令人擔心雙底衰退，離我哋愈來愈近。

股海陰霾揮之不去

隔晚美股高開低收，加埋市傳有歐資行大手賭意大利國債CDS，溢價急升，港股將星期一升幅嘔凸，恒指跌241點，報22,421點，跌市但主板成交較前日多逾30億元，達665億元，沽空金額升36%去到51億元。美國國債違約危機應告一段落，加埋被睇低一線的滙控（00005）中期成績表都對辦，兩個有利條件都把握唔到，升唔穿22,835點七月初高位，扭轉高位一浪低於一浪的劣勢，令人擔心新一輪歐債危機及A股限售股解禁高峰期，八月港股有暗湧。

信義玻璃（00868）毛利達唔到預期，味千（00538）豬骨湯有問題，本來是兩件獨立事件，但從中可以看到大市氣氛「唔就」底下，基金經理唔再局限搵被低估股票，買入等升，反過來，走去搵有瑕疵高PE股開刀，貪股價插水時間較短，比較容易搵到快錢。這樣的市況，認真唔健康。

基於短期唔睇好內銀同保險股，零售股像周生生（00116）與六福（00590）等，又已不再便宜兼似係食胡時候，揀股票推介變得愈來愈難，高息股依然係筆者杯茶。單睇剛出業績的和電香港（00215），一話將派息比例還原至七成五，股價立即逆市做好可見一二。

展現超強避險作用

傳統上，公用股係最佳收息工具，例如兩電，買咗唔怕內地經濟硬着陸，即使美國國債違約，你依然瞓得安樂。或者每年收3.5至4%股息，看官可能認為太保守，但零息環境持續，市場風險溢價高企下，睇番中電（00002）及電能（00006）今年走勢，累積升幅14.3%及26.4%，遠遠跑贏恒指，發揮超強避險作用。

筆者喜歡中電，除了股息高之外，資產負債表內有一定比重的澳洲資產，在美元貶值期有利，預期八月底出中期成績表，到時會再詳細分析。至於前稱港燈的電能，今年中期業績大升四成七，賺40.56億元創新高，公司首次外地業務盈利超越本港供電收益，反映幾年部署減低對香港利潤管制收益的依懶，初見成效，市場將全年盈利預測調高到88.6億元。

近期市場最怕風險，兩電預期息率跌至3.5厘及3.76厘的十年新低。筆者認為不妨等多陣，分別於70元及59元樓下才入貨，中長線回報會較合理。