股海實戰： 潤燃業績料成催化劑

周一港股已預早反映美債危機化解嘅消息，結果當晚美股表現未有驚喜，即使大笨象（00005）股價受佳績帶動報升，亦難阻港股調整，恒指尋日最低見22,387點，收報22,421點，跌241點。成交金額667億元。

金飾股日日都上升幅榜，六福（00590）、英皇鐘錶珠寶（00887）及東表（00398）股價繼續創新高。

此外，汽車股華晨（01114）變「車神」，股價創五十二周高位10.98元，收報10.82元，升3.24%。若然內地啲貴價車真係咁暢銷，近年喺內地積極拓展汽車4S特約店網絡，且為賓利內地總代理嘅大昌行（01828），股價升勢有餘未盡，等隻股落番10元邊，可以考慮伸出「友誼之手」接貨！

內地加息憂慮再現

尋日影響大市表現嘅另一條消息，乃內地官方傳媒報道，八月份加息預期升溫，預計本月十日左右為重要加息時間窗口，而若人行沒有如期加息，則可以預計本輪加息周期將結束，原因係七月以後CPI將逐步回落，人行喺通脹下行之際加息並不常見云云。內地加息憂慮再次出現，再加上工行（01398）H股遭主要股東大手減持，難怪A股發軟蹄，國企指數跌幅達2.09%，跌幅大於恒指。

聽投行朋友話，近年多咗國企紅籌買殼，實際上除咗多個融資渠道應付業務發展，子公司規模較細，發展較靈活，股價亦易於炒上，所以老總們都樂成其事。

見昆侖能源（00135）收歸中石油（00857）旗下後，股價炒高幾倍。隻中國海外宏洋（00081）自易主後股價表現亦唔錯，剛公布中期業績純利大躍進，兼擬2送1紅股，尋日股價逆市升15%，估計送紅股變相拆細後仲有得炒。阿莊揸住上實（00363）旗下嘅上城實開（00563），當初亦係因為聽聞背後故事先至上車，誰知內房冷鋒不去，人算不如天算，惟有繼續守候。

新礦資源考驗耐性

上周買入嘅新礦資源（01231），好似停車熄匙，尋日成交縮減至僅87萬元，收報1.72元，好明顯想請走班跟風人士先至開車，又係考耐力嘅時候。

尋日燃氣股有異動，天倫燃氣（01600）自宣布收購甘肅省天然氣業務後，股價連現兩支大陽燭；揸住北京燃氣嘅北控（00392）尋日曾衝過上41.9元。講到呢個板塊，實力之選當不少得華潤燃氣（01193）。

華潤燃氣股價自七月初成功扭轉自四月以來嘅下降軌趨勢後，反覆回升，由10元邊抽上上周高位11.96元，近日整固11.5元現承接。翻查圖表，其實隻股喺9至12元經已橫行咗年半有多，正常呢個月底公司將公布中期業績，由於去年收購咗多個城市燃氣項目，若業績對辦，東風可助股價突破，升穿12.48元目標見13.5元，穿10.8元止蝕。

戰報

卓悅控股（00653）+10%

錢進於七月二十六日推介卓悅控股，當日低位見過1.39元，昨日若然吼準時機於高位1.54元食胡，都執到一成咁多。

青蛙王子（01259）+20%

阿莊上周五推介的青蛙王子，半新股短暫潛水後大翻身，昨日最高升至3.17元，較當日低位升足兩成。