魚缸Blogger：國際泰豐抵買之選

雖然債務危機總算大步檻過，但花旗國經濟依然弱過藥煲，製造業數據欠佳，拖累恒指尋日將前日嘅升幅嘔凸，回吐241點，報22,421點。之不過，今個月係業績高峰期，筆者深信只要22,000關仍然安在，希望仍在。尋日大市繼續強者愈強、弱者愈弱，內銀、航運同內房股明顯跑輸大市，而個別細價股嘅值博率就開始浮現。

床上用品需求增

其中1隻係國際泰豐（00873），主要產銷棉紗同床上用品，係內地第八大床上用品同第四大棉紗製造商。受惠於產品需求強勁，集團舊年嘅純利就按年增長68%至4.17億元人民幣，而值得留意嘅係，泰豐同時兼具保障房同內需概念，內地未來五年將有近3,600萬套保障房落成，加上內地人均收入上升、消費產品升級，床上用品需求自然龐大。展望今年，集團計劃喺現有近250間店舖上新開近300個銷售網點，藉以加強盈利增長動力。

泰豐往績市盈率約七倍，以內需股嚟講可以話係抵到爛。該股近日醞釀破頂之勢，不妨喺4.25元附近買入，上望4.8元，止蝕4元。

國際泰豐（00873）

目標價：4.8元 止蝕價：4.0元