Fundman睇市：中銀香港四平八穩

債王格羅斯話最快八月會有QE3登場，伯南克指聯儲局會準備經濟刺激方案，只係唔認方案個名叫QE3，似乎全世界都睇實美國六、七月嘅經濟數據會有幾肉酸，逼聯儲局要再出手救市。

前晚，美國公布六月份耐用品定單意外地跌2.1%，主要是運輸設備定單大跌8.5%所拖累，數據唔掂，共和黨同奧巴馬政府就調高國債上限的政治騷沒完沒了。

過去四十年，美國國債上限一共調高七十八次，史提芬就唔信奧巴馬或者共和黨議員，會揀今次揹黑鑊做政治罪人。

偏偏佢哋要學荷里活電影，逼到最後一秒慢動作同個計時炸彈剪電線，做拆彈英雄，最慘係股市要陪佢哋癲，前晚美國VIX恐慌指數抽升至22.98收市，去到近四個月高位，道指在12,751點做咗個小雙頂，跌198點，收報12,302點，假如12,296點的頸線穿埋，短期技術走勢難以樂觀。美國人鍾意用200日平均線作為牛熊分界，依家喺11,966點，求神拜佛今晚GDP數據唔好太離譜，搞到美股又再大插收場。

前晚美股急跌，亞洲股市風險溢價上升，港股最多跌過三百點，兩點半後跌幅不斷收窄，奇迹地倒升收市。最搶眼係和黃（00013），全日升2.65元，報91.55元，市場炒即將公布的業績，因為3G業務虧轉盈，筆者心水股，同系的和電香港（00215）亦創近五個月新高見2.8元，且看過幾日份成績表，一如大行預測，公司會趁現金流改善，調高派息政策。

國美現價買得過

國美（00493）上半年同店銷售升7.4%，高過管理層年初目標3至5%，亦好過內地同業平均的4.2%。管理層透露，五月長假期間同店銷售更錄得10%增長，公司維持未來五年每年開200家分店的計劃，以達到二○一四年直營店達2,500家的目標，國美股價升0.07元，收3.74元，一二年預測市盈率十四倍，PEG只係0.6倍，3.8元樓下仲係相當吸引。

由前稱港燈的電能實業（00006）及中電（00002）尋日股價雙雙創今年新高，可見長達兩年半零息環境，已迫使一眾投資者努力尋找穩定利息回報，尤其今日我哋唔知美國傾息期仲會拖幾耐，萬一好似日本一樣無了期零息，唔揸番啲有Yield工具，真係好輸蝕。iBond本來都可以幫到手，但幫到三年幫唔到一世，高息股先係大家首選。

派息高兼且穩定

本地銀行股下星期開始陸續公布業績，大行估計最好同最差的成績介乎零增長至20%增長，由於存款息率見底，銀行的按揭減息戰有緩和迹象，預期上半年本地銀行淨息差趨向穩定。金管局連番收緊樓宇按揭成數，即使樓市調整，對銀行資產質素的傷害，肯定有限。

儘管有人嫌本地銀行股唔夠進取，今時今日歐美經濟風雨飄搖，仲係持盈保泰比較重要，高息的銀行股，其實幾吸引，好似中銀香港（02388）及恒生（00011）出名高息，預期今年息率介乎4.6至4.9厘，最啱想收吓息，又未去到買債券咁被動的股民，兩者中，又以受惠於人民幣結算業務的中銀香港，是筆者首選。