魚缸Blogger：華耐控股醞釀大動作

尋日恒指喺長實（00001）同和黃（00013）嘅領軍下，由最多跌310點，V形反彈倒升29點，報22,570點，但美債問題將進入埋身肉搏嘅最後階段，一旦議案被否決，三條「A」被褫奪，股市出現震盪在所難免，都係持盈保泰最實際。

往績PE僅七倍

有時股份概念夠，但無炒作只會事倍功半。主要喺內地產銷高端鋼水控流產品嘅華耐控股（01020），雖然受惠於「十二五」規劃中把鋼水控流產品列為新材料嘅國策，能夠享有稅務優惠，加上集團嘅客戶不乏武漢鋼鐵同寶鋼等大型鋼企，而集團本身喺內地亦擁有第二高嘅市佔率，但係近半年嘅股價就慘不忍睹，若以去年純利有近八成五增長計算，往績PE只有約七倍，理論上股價應有唔錯嘅上升空間。

尋日華耐喺一手兩球大手上板提振下，成交升至近三個月以來嘅高位，刺激股價一度逼近10日線阻力，反彈力度強勁，但筆者更有興趣嘅係會否有消息跟尾，不妨喺1.08元附近小注買入，上望1.25元，嚴守1元止蝕。

華耐控股（01020）

目標價：1.25元 止蝕價：1.00元