Fundman睇市：地產股冇理由咁落後

八月二日美國國債違約期限死線已近，奧巴馬來一招以退為進，在電視演說提出國會如果唔通過提高國債上限，一旦美債違約的嚴重惡果。即使大家明知奧巴馬擺明靠嚇，來個順水推舟，將萬一，是萬一真係傾唔掂數的責任，推落共和黨身上。

今時今日，全球央行金庫裏面，三分之二是美元美債，美元根本是too big to fail（大到不能倒），就算衰到賴債，其他央行今日又可以買咩代替美元資產。有人提出買金，的確自人類文明以來，共生產13萬噸黃金，目前主要停留在央行金庫，以及闊太夾萬裏面，今日仲藏响地底，未掘出來嘅大約7萬噸，市價一安士1,612美元計，約值4萬億美元，相當於美國國債兩成八左右，仲未計銀行存款同流通鈔票。

或者你同我都可以將部分鈔票轉為黃金，在今浪鈔票貶值期「減低損失」，但要一個無美元無美債世界，真係談何容易，尤其個個一邊鬧山姆叔叔洗腳唔抹腳，一邊繼續借錢畀佢，仲用佢印出嚟啲銀紙！

港股已展現抗跌力

講番股市，唔少股民上星期仲對調高美國國債上限過關，定過抬油，估唔到一波三折，但意外係港股開始對利淡消息產生抵抗力。周一，唔理A股食瀉藥急瀉3%及希臘又被降級，尋日直頭當奧巴馬的靠嚇言論無到，恒指平開，最多跌31點，開市唔夠半個鐘經已倒升，三隻國有銀行股及中移（00941）貢獻恒指130點，大市收報22,572點，升278點，無奈係大市成交唔多似樣，得628億元，唔算配合升勢，七月期指挾淡倉味道高於一切。

特區政府推出SSD以來，二手樓再無得即買即賣搵快錢，交投如水瓜打狗，被唔少經紀cold call，煩足幾個星期，史提芬忍唔住好奇，周末走去睇示範單位，感受到任志剛之前講過，今日香港樓市已經唔再係七百萬人市場咁簡單。由電梯大堂、示範單位到售樓廳，周圍國語人，奧運站單位都閒閒哋賣二三十球，已經夠嘩嘩聲，奇景係同胞好似買「月下貨」一樣，下晝四、五點經已排住隊等晚上發展商派貨，成幢塑膠模型上貼滿「售罄」牌仔，話SSD出招後樓市由熱轉凍，睇落真係唔多似。

加息期未有耐到臨

香港跟美國玩零息已兩年半，年年都有唔少人估加息周期將至，但睇見美國失業率企穩9%樓上，兼且樓市唔止跌，負資產及強拍的數字不斷上升，要加息？睇怕真係無此條件，假如像日本迷失十年，美元繼續零息落去，香港資產及樓市泡沫吹到幾大，真係估都唔敢估。

美林出報告，講關於未來幾年香港樓市供應量有幾咁緊張，背面頁數字顯示，本地地產發展商股價平均資產淨值折讓，卻是高達41%（經該行以資產市價重估後計算），最平的新世界（00017）折讓62%，最貴的恒隆（00101）都有24%折讓，瓏璽熱賣，可見新地（00016）包裝及銷售有一手，折讓40%。

既然一蚊地皮可當兩蚊賣，何以股票卻六折有售，地產股及樓價的弱強背馳情況會維持幾耐？無人知，但留意到七月中一次大市調整，地產股未有跟跌，會否是追落後先兆，不妨拭目以待。