股海實戰： 國美捕捉上車機會

提高美債上限嘅「死線」臨近，正路去諗，茲事體大，無道理美國國會唔同政府合作，之但係呢個世代好多事情演變出嚟嘅結果係冇譜，正所謂「世事難料」，美債危機一日未解決，入市宜注意風險，量力而為。

港股整固一日，尋日再現反攻，恒指一度抽上22,581點，收報22,572點，升278點，成交才628億元，反觀期指結算在即，七、八月期指成交張數達到16萬張。

空軍部署仍需提防

尋日指數出現反彈，中移（00941）、內銀及本地地產股成動力來源。不過，近期中移沽空持續增加，尋日沽空額6.45億元，沽空比率近23%，小心有凶險在後頭。講到沽空，中石油（00857）近兩日表現與國際油價背道而馳，其沽空額亦明顯增加，尋日該股沽空比率達到16%，好明顯又有空軍大鱷喺度搞搞震！

個別鐵路股尋日有反彈，中國自動化（00569）升逾12%，但南車孖寶（01766及03898）就彈唔得起，小股東真係心都實埋，好在阿莊之前買南車贏過一大浸，嚟到呢啲位，惟有戒急用忍。

講開組合持股，上半年阿莊買賣比較少，皆因身處淡市，少做少錯，唔做唔錯，太過短線嘅即日炒作，難作推介，亦不符一貫嘅策略，故次季增持了現金，以守代攻。好似隻恒地（00012），大股東自三月喺47元開始入場增持，更以每股58元行使公司認購權大手增持1.72億股，天曉得呢兩個月恒地股價會再落番47元水平，大股東增持嘅股票帳面縮水幾多，大家心中有數。雖則喺城中富豪眼中，呢個銀碼只係濕碎錢，但呢個例子說明呢大半年無論大戶小戶都咁難搵食，冇做嘢嘅組合反有機會跑贏大市。除咗股民叫苦，冇份做空軍生意嘅中小型券商亦難過日子！

呢個七月，本來阿莊都想買番啲貨，但睇咗接近一個月都未有行動，皆因外圍不明朗因素未消，入市信心不足。反正都等咗咁耐，急亦急唔嚟，繼續做足功課等機會。

消費旺季帶動炒風

內地早前宣布將個人入息稅起徵點提高至3,500元人民幣，新措施自九月生效，料有助放大今年十一嘅消費旺季效益，第三季係布置消費股嘅好時候。

以「國美」品牌喺內地經營及管理電器及電子消費品零售門店網絡嘅國美電器（00493），近期股價迭創五十二周新高，以尋日高位3.8元計，次季以來累計升幅接近四成。大行瑞銀最近湊熱鬧，將國美目標價由3.7元上調至4.3元，並維持建議買入，主要睇好其上半年經營表現。

圍繞國美嘅股東爭拗已告一段落，公司營運復常，加上內地消費者消費力不斷提升，國美憑着銷售網以及品牌嘅優勢，主營業務前景確可睇好。現價估值預測市盈率約十九倍，是否再有上調空間，中期表現將提供答案。短期若有調整，落番3.4至3.5元區域可留意上車機會。

戰報

保利協鑫（03800）

保利協鑫發盈喜令股價勁升，積奇上周一已睇中，當日見過3.99元，話咁快升至昨高位4.58元，升15%。

大慶乳業（01007）

阿May上周二睇中剛易名的大慶乳業，當日見低位2.34元後便開快車，昨高見2.65元，累計賺逾13%。