魚缸Blogger：國中 翻身指日可待

奧巴馬前晚又為周身債發窮惡，今次仲上埋公仔箱，不過形勢比人強，除咗等之外都別無他法。反而恒指尋日喺內銀股帶動下，重返50日線，升278點，報22,572點；不過，22,800點密集區阻力唔細，而聽日又係期指結算，仲未買貨嘅股友宜量力而為。

打造水務業旗艦

其實國策受惠股除咗有先天優勢，後天努天都好重要。主要喺內地從事水務項目嘅國中（00202），雖然去年業績盈轉虧，但主要係受證券投資錄得虧損，同埋擴展水務業務支出增加所致。事實上，集團積極發展旗下嘅黑龍江國中成為水務業務旗艦，透過收購將其打造為一家日處理能力達500萬噸嘅水務企業。加上「十二五」規劃中將大力發展節能環保同水利建設，相信擁有近11個污水處理廠同供水廠嘅國中將可受惠，所以，當國中旗下嘅水務項目正式踏上軌道嘅時候，亦將會係盈利翻身之時。

國中尋日高開後如入無人之境，殺上1.5元水平，可待股價回試1.48元後小注怡情，上望1.59元，穿1.45元止蝕。

國中控股（00202）

目標價：1.59元 止蝕價：1.45元