博時高層開會 要傳譯

太子尋日同內地前五大基金之一嘅博時基金（國際）行政總裁李鍇食飯時，佢話公司好國際化，總部開會時要用兩文三語溝通，事關有啲淨識講英文，又有廣東人同國語人咁，佢自己有時仲要做埋翻譯，唔通佢哋請咗好多外國人？

「海歸派」員工佔兩成

李鍇話佢哋公司一個外國人都無喎。太子心諗咁神奇？因咩公司一個外國人都無，但語言又咁國際化？

李鍇話，雖然成間公司都係華人，但好多係講abc，連中文都唔識講，成個集團海歸派佔兩成。仲有佢哋所有fundman都要係碩士學位先請，當然有唔少擁有博士學位嘅管理層啦。至於李鍇本人就係廣州人，喺內地讀完書又去過放洋，算係內地第一批海歸派，曾經喺Citi私人銀行、E.J.McKay & Co同埋INVESCO等做過嘢。

講講吓，點解博時要咁國際化呢？李鍇話博時睇好未來中國嘅投資同人民幣市場，所以佢哋要擔當國際投資者投資中國嘅橋樑、以及內地投資海外嘅窗口囉。