股海實戰：神冠醞釀開展反彈

內地鐵路特大事故對整個市場造成震盪，昨日A股跌近3%，與鐵路相關嘅中資股股價全線下挫。如何避免類似嘅意外再次發生，挽回公眾對高速鐵路行車安全嘅信心，已成為中國鐵路發展史上一大挑戰。

作為全國兩大鐵路用車生產商之一嘅中國南車（01766），以及同系嘅南車時代（03898）股價沽壓甚大，跌幅同約14%，乘客同股東一樣當災！究竟今次事故係由於行車技術問題使然，抑或係人為疏忽造成，有待當局深入調查。

之不過，阿莊深信，全國鐵路發展與國家經濟發展步伐已連成一體，事故或會有短期影響，但長遠而言，構建覆蓋全國嘅完善鐵路網嘅大方向不會改變。若然兩股再現非理性拋售，話唔定係危中有機。

新礦資源睇多兩眼

半新股果然有運行，尋日提及嘅青蛙王子（01259）就「跳」上水面，高位做2.69元，收報2.65元，升4.74%，成交9,552萬元。講到半新股，彤叔嘅炒功，有番咁上下股齡嘅投資者都有所聞，月初其系內公司分拆上市嘅新礦資源（01231），招股價1.75元，潛到落1.45元見底回升，尋日以全日高位1.7元收市，成交僅298萬元，相信收貨經已收得咁上下，可以密切留意映期。

去年業績彪炳嘅神冠控股（00829），近日股價有回穩迹象，尋日逆市升3.46%，收報5.09元，成交額3,212萬元。公司業務較獨特，乃產銷膠原蛋白腸衣，去年收入11.52億元（人民幣．下同），增長45%；純利5.13億元，增長57%，派發末期息每股8港仙及特別股息每股2港仙，派息比率達44.2%，五月宣布10送10紅股，全體股東都飲得杯落。

清真腸衣銷情不俗

今年，神冠計劃新增54條生產線，令總數增至220條，預期一一年度產能達到40億至42億米，另預期產量為36億至38億米，有助推出更多新產品種類。去年公司超過96%腸衣作內銷，去年末季推出嘅清真腸衣反應不俗，現正着手擴大海外銷售。隨着新產品成功打入海外市場，將有助分散市場風險。

唔講唔知，原來膠原蛋白腸衣嘅主要原材料係牛內層皮，近年牛內層皮嘅供應維持穩定，有助公司控制成本，維持相對穩定嘅毛利率。去年原料材料成本約佔其總銷售成本嘅比率為43.8%。

以現價計，神冠一一年及一二年預測市盈率分別約為二十倍及二十六倍，估值合理。純睇股價走勢，由三月低位4.235元（港元．下同）回升上六月高位5.95元，累升逾四成，上周四見低位4.89元後喘穩，尋日重返10日線（5.06元）之上。若成功開展反彈浪，短炒目標可訂在5.6元，但宜留意，若掉頭失守250日線4.86元，則宜先行離場，或須回試4.3至4.5元支持始能再作反攻。

戰報

東方表行（00398）

暴炒男七月十四日推介的東方表行，近周表現亮麗，昨日最高升至6.38元，較推介日低位5.5元升16%。

中集安瑞科（03899）

中集安瑞科發盈喜後繼續升唔停，小炒后Sammi上周五叫人留意，當日低位才不過是3.05元，昨日再升至3.5元，兩日加埋執到 15%。