魚缸Blogger:景福盈利能力改善

美債上限談判議而不決,歐債危機又乍暖還寒,恒指尋日回吐151點,報22,293點,但可幸嘅係,上升裂口底部、20日線力保不失,只要內外因素無太大變化,後市仍可維持樂觀。

尋日焦點落喺鐵路相關塊份身上,南車雙雄(01766、03898)由英雄變毛蟲,雙雙急跌一成四,中自化(00569)嘅表現亦慘不忍睹,睇嚟成個板塊復原需時,股友大可睇少一瓣。

積極擴展內地版圖

繼尋日筆者推介嘅超威(00951)即日爆升8%後,其實市場上仲有一啲被遺忘嘅國策受惠股。景福(00280)主要喺中港兩地從事鐘錶珠寶銷售,受惠「十二五」提振內需嘅國策。雖然景福去年盈利倒退約47%至3,461萬元,但主要係由於集團位於尖沙咀嘅旗艦店因酒店翻新而結業,令盈利能力降低。不過,集團近年積極進軍內地,故相信喺完成店舖網絡重置後,盈利表現脫胎換骨嘅機會唔細。

景福尋日喺成交配合下,向上抽穿高低腳雙底頸線阻力,走勢明顯轉強,不妨待股價回試1.83元水平跟進,上望1.98元,1.75元止蝕。

景福 (00280)

目標價:1.98元 止蝕價:1.75元

跨媒體地產網新居入伙 幾萬個精選樓盤 歡迎睇樓!

「Money18免費即秒股票報價網站」現推出8升級功能,財經資訊,實時實發!

暴炒男