港交所告誡 帶眼識人
港交所（00388）又再遭人冒充招搖撞騙。繼早前有不法分子假冒港交所名義欺騙內地股民投資，港交所上市科主管狄勤思尋日又出信畀全港所有上市公司，話近期有冒充上市科職員嘅人士，接觸一啲上市公司，仲要求與有關上市公司嘅行政總裁或首席執行官約談，港交所呼籲上市公司要「帶眼識人」。
有人冒充上市科職員
話說港交所近期接獲幾間在港上市嘅內地企業報告，話曾有聲稱係上市科職員嘅人打電話到佢哋公司，要求與佢哋嘅老總會面。由於早喺一個多星期前，港交所曾發聲明話有人冒充港交所行騙，所以有內地企業即時向港交所舉報，揭發今次事件。
狄勤思喺信中強調，上市科一向指派特定職員，負責監察上市公司及與公司聯絡。而公司與港交所嘅主要溝通渠道，係公司嘅授權代表或公司秘書，港交所唔會貿然去搵公司嘅老總。
狄勤思籲上市公司要帶眼識人。（資料圖片）