市場徐想：紅旗報告 輸錢無仇報
近排大家一諗起民企，即刻諗起紅旗，全因「穆迪紅旗」報告，報告一出街，股價急瀉，單日市值計，冇咗400億元，都咪話唔犀利。
大家都可能唔知，證監今年六月開始，就「提供信貸評級服務」進行監管。無牌，基本上係唔可以從事以上服務。可惜信貸評級之外，又整個紅旗報告。報告內容並不透明，令到大家一時之間都唔知信邊份好。投資者唔知底蘊，梗係先沽離場，但倘若一個唔好彩，由紅旗轉綠旗，股價飛升，咁樣投資者就真係無仇報。
無疑，證監規管係好事，因為起碼各市場參與者唔想因為出位而令自己孭鑊。
發牌只係一種手法，金融市場應該標榜專業，各自喺自己崗位做好，深化自己嘅行內知識，同其他參與者共同合作，咁樣香港金融市場先至可以講得上係有希望。係咪？