魚缸Blogger:澳優 成功突破降軌
尋日港股仍然悶局,中海油(00883)繼續漏油,拖累大市倒跌16點,報21,987點,向上挑戰二萬二關無功而還。呢排興炒iPhone概念股,中移(00941)尋日再升逾2%獨撐大市,而部分資金轉炒和電香港(00215)同數碼通(00315)追落後,至於盈喜及盈警股表現榮辱互見,玖源(00827)同暢豐車橋(01039)分別急升11%同暴跌24%。
收購提升競爭優勢
上落市之中,除咗盈喜股外,有消息跟尾嘅股份仍值得留意。主要喺澳洲進口優質奶粉嘅澳優(01717)尋日宣布,加碼增持擁有逾一百年歷史嘅荷蘭乳製品公司Hyproca Dairy股權至51%,而今次收購嘅意義在於,喺內地日益關注食品安全嘅大環境之中,能進一步鞏固集團銷售高檔、優質奶粉嘅形象,亦能增加競爭力。雖然集團去年盈利倒退,但主要是受重組分銷網絡同營銷團隊影響所致,待相關重組完成,集團嘅盈利可望步入收成期。
澳優尋日復牌後升逾一成,以大成交升穿近四個月嘅中期降軌,但由於升幅頗急,可待完成整固後喺2.32元附近上車,先睇2.7元,2.18元止蝕。
澳優(01717)
目標價:2.70元 止蝕價:2.18元