張天生轉戰大阪食好嘢

股壇前輩張天生一向係美食專家，最鍾意到處搵好嘢食。今個夏天，佢本來諗住相約班老友記去廣州食嘢，但眾人一致話返廣州好熱喎，不如搞搞新意思，直接飛去另一個美食天堂日本食嘢吧。

張天生無懼日本大地震同輻射影響，即時和應，七月初趁住有個短假期，帶埋太太，一行人諗住飛去北海道食新鮮魚生。

不過，臨出發前，旅行社突然通知話去北海道嘅機位爆滿，惟有臨時轉飛去大阪。計太子話，大阪都不錯，一樣有咁多新鮮魚生食，鰻魚燒同埋蟹宴。

美食之旅滿載而歸

一行人到達大阪後，卻人算不如天算，張天生話自己咁啱有皮膚敏感，惟有睇住老婆大大隻牡丹蝦放入口，自己無福消受。佢就大讚自己當時好忍到口，不至於食咗海鮮皮膚敏感發作！不過，唔食海鮮，大阪亦有好多好嘢食，好似和牛，仲有清酒等，總之今個大阪美食之旅，一啲都冇失望，滿載而歸。

返到嚟香港後，張天生已計劃，等天氣秋涼點，就會返家鄉食嘢，美食人生，非他莫屬！