彤叔轉戰英保障房

向來投資有道嘅彤叔鄭裕彤，手頭上儲落嘅中港投資項目多不勝數，家陣似乎有意另覓戰場，據講，彤叔上個月就透過其私人持有嘅周大福，搵咗一間英國公司Pinnacle Regeneration Group試水，特別嘅係呢間公司唔係sell豪宅，而係較廉價嘅保障房。

呢個消息嚟自《彭博社》，太子有問過周大福嘅發言人，佢暫時冇乜回應。周大福水源充足，彤叔對「磚頭」投資又駕輕就熟，話唔定就係因為咁留意到英國房產市場。

購Pinnacle六成股權

咁啱遇上英國政府為咗實施削減開支嘅財務計劃，去年首次容許投資者參與公屋計劃獲利嘅大好時機。彤叔就夥拍另外兩位香港投資者，以3,000萬英鎊收購Pinnacle總共61%股權，進軍保障房市場。

聽聞英國保障房制度同香港幾似，都係以低於市場價嘅租金，租畀低收入市民，差額由政府補貼，依家有近180萬個家庭排緊隊等上樓。喺英國管理近2.2萬套住房嘅Pinnacle，呢類投資回報唔錯，所以未來三至四年投資計劃一籮籮，今次彤叔牽頭嘅投資只係一個開始。