股海實戰：中電信有條件炒一轉

港股繼續唔上唔落，悶局一場。圍繞股海十居其九係利淡消息，加上內地繼續採取從緊嘅宏調政策，香港金魚缸缺「水」情況未有改善，好友要反攻可謂舉步維艱，短線恒指上唔番22,000點，都幾濕滯！

招商銀行（03968）近日宣布第二輪「A+H」供股「抽水」計劃，供股規模喺市場預期之內，落實計劃後，反可撥開雲霧，有助股價回穩。見大行評價多為「中性」，尋日招行股價收報18.14元，無升跌，成交2.9億元。

摩笛相助四環反彈

中投三寶、建材股及中資電訊股股價受壓，旭光（00067）及中芯（00981）分別跌6.3%及12.2%；安徽海螺（00914）及中建材（03323）分別跌3%及2%；京信通信（02342）則挫7.2%，成交1.14億元。講開中芯，大摩將其目標價由0.37元降至0.29元，近年中芯積極構建嘅大翻身形象付諸流水，加上摩笛出擊，難怪股價低處未算低！

大行對客戶同唔係客戶嘅睇法有咩唔同？近期四環醫藥（00460）股價迭創新低，出任保薦人嘅大摩就出報告護駕，解構最近公司進行嘅交易，以釋除外界嘅疑慮，並預計未來六十日其股價有七至八成機會做好，故建議「增持」。得到摩笛相助，四環股價彈6.15%，收報3.45元，成交1.28億元。

光大銀行上市計劃幾時重啟尚屬未知數，但那邊廂卻傳來大型中資券商──中信證券計劃登陸港股。據講中信證券已委任美林、滙豐、里昂及大摩出任「國際協調人」，協助推動在港嘅上市計劃，好日子初定喺九月。呢期內地金融股好似一塊超級大海綿，四方八面係咁瘋狂吸水，未來若能交出好成績回饋股東，將成為內地金融股躋身國際金融市場前嘅重要里程碑。

內房股恒大地產（03333）繼續見到大撼大場面，尋日股價一度低見5.5元，惟二時過後又有飛機盤出場，尾市股價踢穿6元關，收報6.02元，升7.3%，成交13.65億元，其中1.59億元為沽空額。

呢期真係有實錢吸納恒大，再係咁掃上去，唔排除早前大手沽空嘅空軍們要掉頭入場買貨補倉，早前管理層揚言非常歡迎對沖基金沽空，似乎早有準備迎戰，並唔係無的放矢！

尋日另一隻表現相對硬淨嘅中資股，係中國電信（00728），創五十二周新高5.24元，收報5.2元，升2.56%，成交4.84億元，大部分成交集中喺5.2元樓上。

賣iPhone成炒作藉口

查實中電信炒來炒去都係有關推售iPhone產品嘅消息，傳聞最快十一月成事，公司已表明沒有時間表。

股海一個有趣嘅地方，乃係好消息一日未成事實，股價仍然可以繼續炒高。再講，近期隻股交投活躍，走勢亦呈突破，目前十四天RSI處於60，似乎有條件行多轉，上望5.6元，10日線支持喺4.98元。

戰報

熔盛重工（01101）

暴炒男喺七月四日推介隻熔盛重工，當日低位只係4.83元，尋日尾市抽升至全日高位5.27元，賺逾9%。

+9%

大昌行（01828）

Sammi上周二介紹大昌行，當日低位只係8.9元，昨日就算稍為調整，高位9.82元仍較當日低位升一成。

+10%