魚缸Blogger：利信達 彈力強勁

身懷六甲多日嘅恒指，似乎仍未走出困局，尋日更一度跌穿上周二大跌市嘅低位21,648點，雖然隨後有買盤吸納，拗腰倒升97點收市，報21,902點，但22,000大關阻力重重，後市仍然未許樂觀。

尋日輪到水泥、機械設備同新材料股被洗倉，而剛宣布供股嘅招行（03968），雖然可以平收18.14元，但新一波內銀抽水潮可能已經悄悄展開！

財力充裕支持擴展

內需概念長炒長有，鞋股利信達（00738）今年三至六月嘅整體銷售按年增長逾30%，而港澳地區亦有雙位數增幅。同其他內需股一樣，集團亦計劃擴大業務，預料今年喺內地新開嘅分店會有200間，而由於集團嘅銀行貸款只有350萬元，但手頭現金就有3.48億元，所以資金方面相信唔會成問題，加上臨近業績公布期，以其今個財年頭四個月嘅表現，隨時發盈喜亦唔會感到意外。

利信達股價尋日在成交配合下強力反彈，現價與10日線只有一步之遙，相信整固過後有力再試高位，可吼低喺4.3元吸納，上望前高位4.75元，跌穿4.17元止蝕。

利信達（00738）

目標價：4.75元 止蝕價：4.17元