渾水遭冒充誓要打假
俗語話「人怕出名豬怕肥」，原來應用喺外國人身上一樣合適。太子講嘅係早前憑「沽空加唱淡」成名嘅渾水研究（Muddy Waters）創辦人Carson Block（渾水哥），澄清話渾水嘅報告只會喺網站及向訂戶公布，若查明有人冒認其名聲，必會採取法律行動云云。
創辦人唔識得雨潤
渾水哥所講嘅係，早前雨潤（01068）被「洗倉」嘅推手，就係市場傳聞話渾水會推出攻擊雨潤嘅報告，但係佢話自己連雨潤係咩公司都唔知，成件事明顯係有人利用渾水嘅名聲，企圖從中獲利，令佢好困擾，甚至會考慮狀告盜用佢名聲嘅人。
其實「出名」一向都要付出代價，尤其是當「名聲」可帶來巨利時。渾水哥亦明白自己嘅長處，所以講到明只要中國一日仲有「造假文化」，佢都會繼續「打假」，但就可能不再一味「做淡」，遲吓可能嘗試「長揸」自己喜愛嘅公司，隨時賺嘅錢比「做淡」仲多。太子就心諗，唔通渾水哥遲啲想「從良」？
渾水研究創辦人Carson Block稱，對雨潤公司不認識。（資料圖片）