股海實戰： 德永佳博財息兼收

歐洲銀行壓力測試結果遭受質疑、美國政府又正為爭取國會批准提高發債上限而奔波，內地又傳來內房限購令擴大，外圍利淡因素一大籮，港股繼續冇運行，尋日大市成交下降至514億元，炒家真係愈來愈難搵食！

藍籌股之中，尋日跌得最甘嘅係中信泰富（00267），事緣旗下澳洲鐵礦項目延期投產，加上高盛踩多一腳，因應消息調低其評級至「中性」，目標價由25.8元降至21.4元，拖累其股價最多跌逾9%，收報16.84元，跌8.48%，成交5.55億元，市值蒸發逾半百億元，恐怕股價要喺15至16元水平整固一段時間。

中資股魅力猶在

中芯（00981）尋日復牌，股價急跌逾9%，收報0.57元，成交1.29億元，公司宣布委任張文義為主席及執董，而CEO王寧國已辭任。本來以為搞掂同對岸同業嘅長期訴訟糾紛後，可以過吓安樂日子，誰知又鬧出主要股東之間就高層委任存在重大分歧，呢家公司真係多災多難，小股東有苦難言，幾時先至可以真正走出低谷，真係天曉得！

中國南車（01766）尋日收報6.55元，觀其A股（601766）五月份低見6.34元人民幣後已觸底回升，偏偏H股要開倒車，真係冇嘢講！由於估值有數得計，會繼續持股，但市況未明，故暫冇打算溝貨。

紅籌、國企表現如此，民企股缺乏實力大股東且監管相對鬆散，喺呢類大淡市容易出事係可以理解。就連有「歐洲股神」之稱嘅Anthony Bolton亦因為投資民企而損手，當事人亦承認低估咗投資中國嘅風險，已着手清理基金投資組合，但強調未動搖投資中資概念股嘅信心，日後會加強盡職審查工夫云云。點解知道有風險都唔放棄投資中國股份嘅機會？答案係中國市場嘅增長故事魅力猶在，這亦正好說明了廣大投資者嘅心聲！

雖然尋日跌市，但亦有個股可以逆市創新高，其中1隻係德永佳（00321），尋日股價以大成交升至10.42元，收報10.2元，升3.66%，成交4,423萬元。

憧憬分拆利估值

德永佳本來專做產銷及整染針織布及棉紗，近年積極拓展中港兩地的便服、飾物零售及分銷業務，由上游工業拓展至毛利率及增長前景較佳嘅中、下游業務，去年度便服及飾物零售及分銷業務嘅生意額達到58.53億元，經營溢利達4.07億元，已具分拆獨立上市嘅條件，適逢近季零售股成逆市奇葩，德永佳身價亦水漲船高。

即使假設本年度純利持平，現價預測市盈率才十二倍，一旦傳來重組消息，股價仍具爆發力。

公司派末期息每股0.3元，下月九日除淨，短線回吐守9.5元有得諗，博財息兼收，目標試衝11元，9.2元止蝕。

戰報

第一拖拉機（00038）

May上周二推介一拖，當日低位見過9.7元後，股價便慢慢上升，昨日逆市再升，最高見10.62元，若食盡高低波幅可賺近一成。

香港中旅（00308）

Sammi又有好推介，上周三叫人睇實隻香港中旅，公司發盈喜，又有分拆概念，果然不同凡響，股價升高後抖抖又嚟過，昨日最高見過1.65元，不消數日升接近一成。