魚缸Blogger：新天綠色 升勢未盡
正所謂十個牛皮九個淡，歐美債務危機懸而未決之際，港股尋日繼續橫行待變，恒指全日跌70點，收報21,804點，成交得番514億元。不過，今個禮拜將有多家美國巨企公布業績，加上美債上限談判進入白熱化階段，或許會令平靜嘅金魚缸泛起一點漣漪。
CDM項目帶動盈利
要揸得安心，除咗強勢股外，績優股亦係唔錯嘅選擇，其中一個例子就係筆者最近推介嘅東表（00398），由盈喜到公布業績後迭創新高。珠玉在前，筆者今日再揀來剛發盈喜嘅新天綠色能源（00956），集團以河北為根據地，從事天然氣銷售同風力發電投資，由於河北受內地風電政策的影響較小，而且公司嘅天然氣業務受國策扶持，所以業績得以保持穩定增長，加上旗下新增清潔發展機制（CDM）嘅註冊項目顯著增加，令今年上半年純利將較去年同期翻一倍。
雖然新天綠色尋日升幅唔細，但根據經驗，剛發盈喜嘅股份急升一輪並完成後抽之後，往往會迎來另一輪升浪，因此可待股價回試2.2元附近上車，先看2.49元，跌穿2.1元止蝕。
