太子手記：AXA安盛改名大陣仗
相信大家對「AXA國衞」唔會感到陌生，不過以後大家就要改改習慣，因為佢哋宣布改名做AXA安盛。尋日AXA安盛就舉行慶祝儀式，AXA安盛行政總裁夏偉信就講笑咁話，佢準備咗好多新卡片，要重新派畀每一個人。據聞為咗籌備今次改名，AXA安盛準備咗超過半年，唔單止公司名轉咗，連佢哋喺灣仔大本營嘅國衞中心，亦改名做安盛中心。
統一股權 重塑品牌
其實今次改名都係意料中事，事關AXA喺香港產險方面嘅子公司一向叫安盛，但主打壽險嘅就叫國衞，搞到兩者好似無乜關連咁；加上今年四月時，本身持有AXA國衞超過五成股權嘅法國AXA集團，向澳洲股東收購埋剩餘股權，所以AXA安盛重新打造中文品牌，可謂順理成章。
既然股權集中咗，AXA又會唔會好似友邦、保誠咁，喺香港上市集資呢？AXA亞洲區行政總裁白素輝同太子講，暫時無咁嘅計劃喎，不過佢哋對購併就持開放態度o架。
夏偉信稱迎接公司改名做AXA安盛，已經印咗好多新卡片。