股海實戰：一拖目標上試前高位

咩叫「反口覆舌」？伯老呢頭話推嗰頭又話唔推QE3嘅言論，就係好例子，投資者真係無所適從﹗呢期歐、美孖寶真係佗衰家，歐債危機消息一次比一次糟，萬一美債上限問題搞唔掂，隨時會令全球股市再來一次大震盪！

內房限購令擴展至三、四線城市，內房股再受衝擊，上周五中國海外（00688）、保利香港（00119）跌4至6%；恒大地產（03333）繼續大撼大，上周五尾市股價轉跌為升，收報5.83元，升2.8%，全日高低波幅達11%，成交達17.3億元，其中3.48億元為沽空。

內房股面臨危機

阿莊最擔心係，由於主營三、四線城市內房業務嘅多數係中小型發展商，財務實力普遍遜於龍頭發展商，一旦宏調風暴吹到三、四線城市，呢批中小型內房企業可能好易被吹倒，並引發內銀進一步收緊信貸，骨牌效應之下，或會引發內房企業倒閉潮，故內房股仲係只可遠觀而不可褻玩！

上周五風電股亦「瘋跌」，中傳動（00658）跌6.2%，金風科技（02208）更創掛牌以來新低，跌7.4%。查實最近大行對風電股睇法都係「口淡淡」，事緣中央收緊地方政府對風電項目嘅審批權，未來新項目喺取得審批以及貸款方面都會更為嚴格，加上相關設備產品毛利率受壓，投資市場對風電股嘅喜好亦隨之減退，難怪原定本月在港掛牌嘅京能打退堂鼓，呢個板塊亦未到抄底時候。

提及新股，高鑫零售（06808）上市臨埋門「撻Q」，原定上周五掛牌未有成事，原因係招股書中每股盈利數字「不詳盡」，三大保薦人犯咗「低級錯誤」，咁嘅烏龍亦真係太過兒戲！港交所（00388）咪淨係掛住搞改革，對於保薦人嘅低水平錯誤，必須要嚴肅正視，以免影響香港金融中心聲譽。

內銀、內房股仍處弱勢、新興產業正處調整期、傳統醫藥、汽車、家電股估值亦唔算得係便宜，結果游資惟有繼續循保障房概念，炒多幾轉水泥股，密食當三番。其實依循國策，農業股亦係相對穩陣嘅板塊，特別係今年農產品價格上升，而中央對農業嘅扶持政策又有增無減。

具轉嫁成本能力

避開民企，農機H股第一拖拉機（00038）上周五股價逆市上升，高位做10.4元，收報10.32元，升4.5%，成交5,473萬元。

一拖嘅賣點係從事嘅農業機械受惠農機補貼政策，今年首季收入按年增13%至38億元人民幣，由於公司有一定議價能力，料可將成本上升壓力轉嫁客戶，今年毛利率趨穩。

保守估計，一拖現價預測市盈率約十二倍，由於業務的發展前景能見度高，估值具吸引力。再睇走勢，一拖五月下旬至六月中旬已經進行調整，並成功考驗9元關承接，近日更重上10日及50日線，且成交增加，走勢轉強，目標可以再試四月高位11.5元，跌穿9.7元止蝕。

戰報

熔盛重工（01101）

Sammi上周三推介熔盛重工，當日低位見過4.81元後回升，上周五逆市升至5.44元高位，賺足13%。

+13%

天能動力（00819）

帥哥七月六日揀咗隻天能動力，當日上車位喺3.77元，同周五高位4.2元相比，亦輕易賺到11%有多。

+11%