魚缸Blogger：YGM重獲資金關注
尋日港股基本上只可以用一個悶字嚟形容，高低波幅得198點，成交跌至620億，埋單微升13點，報21,940點，雖然前晚伯老的講話令人對QE3有無限聯想，但市場似乎唔多受落。
金礦股同汽車電池股尋日發威，升幅普遍有4至7%，而部分手袋股同車股亦有炒作，但內銀股喺配股集資同股東減持嘅憂慮下偏軟。
有時大市缺乏方向，反而造就平時被人忽略嘅股票。主要喺大中華地區經營中高檔服裝品牌嘅YGM貿易（00375），雖然受惠炒極都唔完嘅內需概念，但表現始終未如其他焦點內需股咁標青。直至集團喺上月底公布去年業績，全年純利增長42%至2.8億元後，才吸引到資金注意。
突破旗形走勢
事實上，集團去年嘅毛利率增加咗2.5個百分點至67.1%，喺同業中屬唔錯水平，加上年內嘅資本負債比率降至2.9%，手頭上現金又有近4億，而集團亦表明會積極拓展業務。YGM尋日突破旗形走勢後創下今年高位，不妨待股價回試23.4元附近小注一試，目標26元，22.7元止蝕。
