太子手記：卓百德安度禁鬚期
股票「禁售期」聽得多，「禁鬚期」你聽過未？大摩前董事總經理、現任Portwood Capital主席卓百德（Peter Churchouse）來示範。
卓百德喺香港工作三十一年，曾經成功預測九八年金融風暴嘅出現。佢見過咁多報、上過咁多電視，就算唔認得佢個樣，都會記得佢係留鬚嘅。早幾年佢就剃咗佢嘅「二撇雞」。
禁鬚三年籌1.5萬善款
原來係一件善事，佢係香港遊艇會嘅活躍會員，該會需要為菲律賓某個機構籌錢興建一個廚房，卓百德出賣自己招牌鬚。有人肯出1.5萬元買佢撇鬚，但條件係三年內唔准再留鬚。
卓百德嗰三年都以青靚白淨嘅樣示人。不過唔知點解，太子覺得佢冇鬚個樣好似比較輕佻，好彩依家「禁鬚期」已過，又可以用成熟穩重嘅Look見人嘞。
