短炒倉：深國憧憬業務重組

歐債風暴吹到意大利，雖然呢幾年我哋成日話「大得不能倒」，但歐洲銀行界硬食完凱撒沙律同葡撻，若然再嚟咁大碟意粉，就真係「骾」死都有之，當歐盟再無能力包底，試問仲有邊個可以保證意大利唔會爆煲？

港股尋日反彈263點，但成交就縮番去650億左右，純粹技術反彈居多。市場陰霾未散，投資者都宜以穩陣為上，公路股因現金流強勁，一向被視為防守之選，不過深圳國際（00152）上月就宣布，將在未來幾年逐步向子公司深高速（00548）注入公路項目。

擬向深高速注資

睇番去年業績，收費公路佔深國總盈利超過六成，注入深高速後，盈利缺口如何填補自然是關鍵，但由集團早前以9.43億元作價，增持深圳航空股權至49%，可見未來或會以航空業務為主，配合近年積極拓展的物流業務，發揮協同效應，成為盈利基礎。

以昨日收市價0.63元計算，深國往績市盈率僅6.9倍，估值吸引，考慮到未來向子公司注資，加上手頭尚有1.33億股南玻A股也是待價而沽，業務重組的相關消息，可望對深國股價帶來刺激，不妨伺機於0.6元樓下吸納，中線目標0.7元，止蝕0.55元。

深圳國際（00152）

目標價：0.70元 止蝕價：0.55元