股海實戰： 中國食品上升動力足

美股前晚走低，但跌幅小於預期，港股前日反應過大，尋日上晝即高開逾百點，內地次季及上半年GDP按年增幅分別為9.5%及9.6%，反映經濟保持較快增長，緩減「硬着陸」風險，A股滬綜指反彈逾1%收市，午後港股保持升勢，惜未能重上22,000點，收報21,926點，升263點，成交649億元。

歐債危機惡化係鐵一般嘅事實，次季以來道指兩次受制於12,800點水平下回落，短線若失守50日線12,368點，或須再次下試12,000點支持。呢一刻阿莊對下半年中、港兩地股市表現並不悲觀，只係仍未睇得通外圍走勢，短線或會先着手調整投資組合，沽出表現欠佳嘅股份，套現準備低吸實力股迎接升浪。

摩通替百盛出頭

「紅旗」飄揚過後，尋日市場開始出現質疑穆迪的聲音，禹洲地產（01628）指報告有關更換核數師的批評失實，摩通更替百盛（03368）出頭，指紅旗報告指的風險不成立，個別上榜的上市公司亦指穆迪根本無聯絡過公司了解真正情況，言下之意均指這間向被視為權威的評級機構，無認真研究便亂作抨擊，居心叵測。

尋日提及擬沽出天津港發展（03382），且看今趟能否喺1.6元樓上落車。至於擬換入嘅新環保能源（03989），原來前日嗰廿五球大手上板，係大股東北京首創增持，尋日隻股收報0.6元，跌3%，可惜交投唔夠，買唔到幾多貨，會繼續耐心等候入市機會。

另一持股港鐵（00066），月初以來股價持續下跌，至昨日終於回穩，且現十字星。事實上，近兩個半月，港鐵股價下跌，但RSI明顯見到背馳，相信今次浪跌已接近尾聲。

憧憬取消限價令

前年內地拋出4萬億元人民幣救市方案，去年不少油脂壓榨廠項目開工，行業產能增加，大豆需求上升，不少廠商更積極進口大豆，致令去年底國際大豆價格顯著上揚。之不過，喺防通脹嘅大前提下，內地部門對食用油實施限價令，終端產品售價冇得加，但原材料價格不斷上升，變相擠壓生產商嘅毛利，故見部分廠家索性唔開機，以免做得多蝕得多。

不過，呢個消極嘅情況可能有變，事緣食用油限價令即將完結，八月食品油或會掀起漲價潮。更有報道指，內地第三大食用油品牌——魯花花生油，近日已率先開始提價。

中國食品（00506）主要經營「福臨門」及「四海」等多個品牌小包裝食用油，另喺糖果、葡萄酒行業擁有領導地位，並與可口可樂公司合作生產及銷售可口可樂系列飲料。受原材料成本上升影響，去年其廚房食品毛利率由前年度嘅9.7%降至8.5%，相信今年上半年毛利率持續受壓，若然第三季真係可以鬆綁提價，料有助改善情況。

次季中國食品股價累升達三成多，表現跑贏大市，畢竟公司主力從事食品消費業務，行業處於增長期，加上公司喺品牌及產銷上具備優勢。

下半年酒品業務利潤復甦以及食用品業務受惠限價令取消，將成為推動股價上升嘅兩大「摩打」，短線回吐守6.2元可關注，目標上試7元關，止蝕位則睇5.8元。

戰報

大昌行（01828）

積奇獨具慧眼，早前睇好隻大昌行，股價愈走愈起勁，六月二十四日推介當日最低見過8.25元，跟昨日9.7元高位相比，足足升咗17.5%。

恒大地產（03333）

姚午齊在市況低迷中發掘到恒大地產，股份的確不負所望，周二推介時低位5.4元，昨日彈升至5.98元，升幅逾一成。