魚缸Blogger：東表盈利能力佳
經歷過前日大跌市後，雖然圖表上尋日恒指出現利好身懷六甲嘅訊號，反彈263點，收報21,926點，但喺22,000關前已遇阻力，而成交亦落番去650億元，加上歐債危機陰晴未定、美債上限談判又裹足不前，所以尋日僅屬技術反彈，股友們不要太認真。
尋日強勢股水泥、汽車、內房同消費類股份都有唔錯表現，而內銀股亦喺農行（01288）盈喜帶動下一洗頹風，普遍錄得近2%升幅。
估值相對同業吸引
股市永遠都係強者愈強嘅遊戲，只要有資金追捧就可以長炒長有。雖然東方表行（00398）股價由今年四月以來已累升近八成四，但由於集團主要喺中港澳台從事名貴手錶的分銷同零售業務，食正個人遊來港同內需概念，所以去年純利按年增長近倍至2.19億元，加上其出售嘅高檔手錶定價能力高，可以輕易抵銷租金上調壓力。
東表另一個賣點就係估值平，相比起同業動輒二十倍嘅往績市盈率，東表只係十三倍，而該股近日亦喺10日線初現支持，相信整固後有力炒上，可待股價回試6.55元附近跟進，目標7元，6.2元止蝕。
