太子手記：寧高寧為面子成功戒煙
中糧集團董事長寧高寧自言，「煙齡」三十五年，終於喺舊年戒煙，令佢有少少「改邪歸正」嘅感覺。佢話戒煙唔係畀人逼，又唔係健康出現問題，只係因為「面子」而戒。
把心一橫免受歧視
寧總話時代唔同咗，呢幾年覺得食煙係一件愈嚟愈唔合潮流嘅事，無論喺餐廳、機場定係喺會議室，煙民好多時被歧視。
有次寧總見到某公司廁所門除咗有廁所兩個字之外，後面加個括號寫住吸煙室，佢覺得吸煙已被視作唔乾淨，於是把心一橫戒咗。
寧總話戒煙唔算好難，因為佢自己好着重「面子」，講得出就會做得到。有個朋友唔信佢會戒煙，仲挑戰佢話，如果你戒到煙，我就戒食飯。就係咁，寧總話自己好似上咗跑道嘅運動員，無後路可退，所以堅持到底戒咗。
依家佢話自己已經喺一個唔同空氣嘅空間中生活啦！
中糧董事長寧高寧終於在去年成功戒煙。