股海實戰：德普小注投機操作

歐債危機拖冧全球股、匯和商品市場，繼前晚外圍股市急挫過後，亞股尋日接力向下，恒指低開254點後未見反彈，午後A股收場跌1.7%，淡友全力進攻，恒指跌幅顯著擴大，一度低見21,648點，收報21,663點，跌684點，大跌市成交回升至805億元。期指低水88點，單係即月期指成交張數達10.2萬張。

期指賭場彩池愈來愈大，股海頓成鱷魚潭，為免成為大鱷點心，股民宜打醒十二分精神，暫避指數成分股為妙。今次港股反彈浪來去匆匆，阿莊亦慶幸冇積極入貨撈底，短期要觀望21,300至21,500點水平承接，再作部署。

大行報告不能盡信

近期股海「空軍」與評級公司嘅行動時間似乎頗多巧合之處。繼唱淡內銀股後，最近又有評級公司發功，呢次輪到民企股。穆迪嘅「紅旗」測試發現有6家民企較值得關注，其中在港掛牌有5家，分別為西部水泥（02233）、永暉焦煤（01733）、旭光（00067）、恒鼎（01393）及龍湖（00960），尋日股價全線「大飲茶」，跌幅介乎4至14%，其中龍湖尋日成交4.19億元，有2.3億元係沽空，話冇「空軍」搞作都冇人信！

大行報告近日引起風波，事緣高盛上周三首予興達（01899）「確信買入」評級，勢估唔到一周未到就自行認錯，指因計算收入組合出錯，故將興達評級修正為「中性」，興達股價即插13%，尋日再跌2.8%。大行報告水平令人失望，並對股份價格造成大幅波動，如何保障投資者利益，且留待監管部門檢討。投資者要自保，惟有抱着「不要盡信」嘅心態看待大行高見，宜多比較不同數據後才下投資決定。

繼續耐心等候入市機會嘅來臨，多花工夫發掘值博股份。尋日阿莊提及過新環保能源（03989），有好位上車嘅話，會考慮沽出天津港發展（03382）套現換入。此外，今日又睇睇變身股—德普科技（03823）。

變身環保股有賣點

德普本來係從事製銷電解電容器業務，去年曾計劃收購印尼鐵礦，但未有成事，之後見董事局頻換人，今年一月及五月先後透露擬涉足LED燈相關投資項目，近日公司宣布擬斥1.6億元收購目標集團六成股權，項目有盈利保證。今趟公司擬變身環保股，概念係有賣點，但能否成功為公司構建一門有盈利嘅新業務，就要放長雙眼等着瞧！

再睇其股價走勢，喺低位橫行大半年，本月初終於起動，尋日股價逆市靠穩，收報2.29元，升1.3%，成交2,316萬元。阿莊相信，呢隻股街貨唔多，近期股價異動，開始聞到炒味。事實上，若然未來公司真係要大搞環保業務，推高股價部署融資嘅可能性存在，可視乎交投小注投機性操作，睇圖嘅話下站目標可放喺2.55元，止蝕位2.08元。

戰報

廣汽集團（02238）

Sammi上月二十一日睇中嘅廣汽，雖然近日累積不少跌幅，但以當日低位7.96元起計，至昨日最高位9.3元，仍然賺近17%。

TCL通訊（02618）

積奇上月二十九日吼中TCL通訊，由當日低位6.18元升至上周五高位7.38元後見頂回落，但即使以昨日高位7.3元計，仍獲利18%。