魚缸Blogger：鐵貨業績值得憧憬

受內外因素夾擊，尋日恒指開市已經一瀉如注，隨後淡友得勢不饒人，隊到落接近全日低位21,663點收市，埋單唔見684點，成交增至805億元，死亡交叉威力果然唔嘢小！睇嚟淡友今鋪非要質到去今年低位21,509點不可，股友們要扣好安全帶！

大市雖然驚濤駭浪，但個別股份仍值得留意，主要以開採鐵礦石為主的鐵貨（01029），除咗母公司來頭強勁，貴為俄羅斯第三大金礦企業外，集團嘅產量亦持續上升。

議價力優於同業

繼今年首季產量較去年增加52%後，今年上半年總產量更較去年下半年大升1.4倍，且集團生產嘅精礦品位平均高達65%，議價能力較一般鐵礦石強，加上全球最大鋼材生產國中國嘅鐵礦石需求不斷上升，連帶內地進口鐵礦石價格亦有可觀升幅，鐵貨自然受惠。

即使鐵貨去年業績仍錄得虧損，但已較招股書嘅預測為佳，而集團旗下各個礦場亦提速生產，今年全年盈利應有好表現，可待股價回試1.74元附近小注跟進，目標1.9元，1.67元止蝕。

鐵貨（01029）

目標價：1.90元 止蝕價：1.67元