王國安圍港交所抗議
港交所（00388）交易大堂門外今日會好熱鬧，證券及期貨專業總會會長王國安，會發動數十名經紀行家喺今日十二時半「圍」交易所，抗議近期港交所連串「惹火」改革建議。行政總裁李小加就冇有怕，將會親自出嚟接信。
王國安話到時會提出港交所「七宗罪」，包括港股加時、期指加時、收市競價、隱名交易、收窄買賣差價、遙距交易、花費15億元興建數據中心。
詹培忠教李小加接招
示威都未夠，晚上七大證券組織共30多人，會喺立法會議員詹培忠安排下，喺中總同李小加「鴻門夜宴」。為免飯局鬧僵，詹培忠尋日下午先同李小加私底下會面，仲畀咗3個貼士李小加。第一係今晚宜只聽意見，不用發表太多；第二係要清楚講畀業界聽會顧及佢哋嘅營商環境，因為就算「交易所肯出雞，都要人哋肯出豉油㗎」；第三係李小加雖然係總裁，但也不是可以「隻手遮天」，任何決定都要董事局批准。不過，最重要都係「唔啱講到啱」，一人行一步！
王國安不滿改革建議，今日會力數港交所「七宗罪」。（資料圖片）