股海實戰：神數估值重現吸引力

港股尋日一如所料隨外圍走低，恒指最多跌419點，收報22,347點，跌379點，成交降至只有585億元。恒指經已回補了本月初嘅上升裂口位，短線若成功重上22,400點樓上喘穩，後市唔使睇得太淡。

又快到中資股業績期，宏華（00196）及雨潤（01068）股價逆市上揚，升幅分別為5.3%及1.8%。提及雨潤，六月份CPI增幅進一步擴大，主要受豬肉價格上升影響，有城市民工表示，因負擔不起昂貴肉價，一周都未曾有豬肉落肚！再係咁落去，可能演變成社會問題。最近溫總到陝西考察，期間專程參觀養豬項目，可見中央高度關注豬價高企問題，唔排除會着手制訂有關穩定生豬供應嘅措施。

中旅憧憬分拆注資

過去阿莊唔只一次品評過中旅（00308），指其業務發展及股價表現均未盡人意。尋日有報道指，中旅擬加快落實分拆旗下資產值達40億元人民幣嘅酒店業務，明年初以介紹形式在港上市，另擬向母公司收購更多旅遊項目，如青島海泉灣，以及入股江蘇周莊遊古鎮成單一最大股東等。

因須澄清報章報道，中旅尋日停牌，其後發表聲明表示考慮分拆建議，另外公司剛就中期業績發盈喜之下，復牌後股價有得升。之不過，分拆和注資計劃畢竟均需時落實，短線股價若未能成功企穩1.5元樓上，相信下半年仲有買平貨嘅機會，所以唔使心急入市追貨。

呢期二、三線股炒風短癮，淡市炒出炒入多半浪費銀彈，故阿莊呢期都係按兵不動。反而，睇準個別股仔基本因素有重大突破，可以趁靜靜局播定種，放長線釣大魚。為此，阿莊正(目及)實新環保能源（03989），皆因公司已由北京首創入主，未來喺從事環保新能源業務方面將獲得母公司全力支持，尋日見該股有25球大手過貨，話唔定幕後人士正布置倉位，若短期交投增加，計劃先買首注。

新業務步入收成期

講完股仔又睇番基金股，最近獲摩通重申給予「增持」評級嘅神州數碼（00861），股價由五月高位16.02元，反覆回落至上月低位11.92元，累跌幅度達25%，往績市盈率落番13倍，估值具吸引力。

截至今年三月底止年度，神數純利創歷史新高，達到10億元，按年增幅21.97%，毛利率增加0.31個百分點至6.89%，足以證明近幾年公司將IT分銷業務擴展至IT服務嘅策略成功。

未來公司業務發展重點，乃配合內地城市化進程，捕捉「智慧城市」發展嘅商機。

如今這方面嘅戰略布局已覆蓋內地57個城市，圍繞市民卡、區域衞生、智慧旅遊、政企通、綜合治稅、資料交換、雲服務以及安全監測等解決方案日漸成熟，新業務策略可望喺「十二五」的幫助下，帶領公司發展走向另一高峰，股價喺11至12元水平可分注作中線收集。

戰報

勝獅貨櫃（00716）

積奇上月三十日吼中勝獅，股價由當日低位3.02元計，升至昨日最高3.5元，可賺近16%。

中石化（00386）

Sammi六月二十日「貼中」中石化，股價當日低見7.12元，昨日升至高位7.95元，累計獲利近12%。