魚缸Blogger：裕元 現價離底不遠

恒指尋日乍現死亡交叉，下晝跌勢加劇，最多跌逾400點，埋單收報22,347點，跌379點，成交唔夠600億，值得留意嘅係，10日線已告失守，而上周一營造嘅上升裂口又差唔多回補咗一半，短期後市不容樂觀。不過，部分半新股續成逆市奇兵，喜尚（08179）同翔宇疏浚（00871）嘅表現都非常靚仔。

盈利表現有保證

雖然一眾內地體育用品股因存貨過剩、定單增長放緩而被洗倉，但從另一角度睇，這或者反映國際品牌喺內地已逐步站穩陣腳，連帶產品製造商亦受惠。裕元（00551）為全球最大嘅品牌運動鞋製造商，同時兼營產銷運動服裝，主要從事設計加工同代工生產，而主要客戶正正係一班銳意喺內地大展拳腳嘅國際品牌，好似Nike同adidas咁。集團除咗享有穩固嘅壟斷地位外，主要客戶嘅銷售亦節節上升，好似Nike就將一五年財年嘅銷售目標增加逾一成至300億美元，所以裕元嘅盈利表現相當有保證。

裕元近日穩守10日線之上，而現價離橫行區間底部支持不遠，息率亦有3.5厘，目標可先看28元，訂24元止蝕。

裕元集團（00551）

目標價：28元 止蝕價：24元