港交所安全帽顏色分等級
港交所（00388）位於將軍澳嘅新一代數據中心，總投資額高達15億元。尋日數據中心進行奠基，咁重要嘅儀式，梗係要邀請一眾猛人見證呢個歷史時刻。
太子在場所見，新數據中心仍是地盤一個，工人正加快趕工，為咗各出席人士嘅安全，無論係政府高官、工作人員、傳媒等，都一律規定要戴上安全帽才可入內。
李小加汗流浹背
太子見識少，以為安全帽只有黃色，點知發現在場竟有3種顏色，而且嘉賓，好似財庫局副局長梁鳳儀、財庫局常任秘書區璟智、港交所主席夏佳理、行政總裁李小加、港交所董事等，頂安全帽「零舍不同」，係閃令令嘅金色，「高人一等」。
港交所其他職員就戴上白色安全帽，至於太子，就梗係最普通嘅黃色啦。
尋日唔知係咪天氣關係，現場較為悶焗，路面又沙塵滾滾，大家早已熱到不得了。李小加更汗流浹背，更多次在答問環節中，話大家咁熱，不要咁辛苦，早點返去休息。
港交所數據中心奠基，一眾嘉賓見證歷史時刻。（中新社圖片）