魚缸Blogger:復星可候回吐吸納
內地六月份CPI升至近三年高位，加上花旗國上月就業數據差強人意，同埋今個禮拜公布嘅內地經濟數據，未知會否受內地收水影響，料港股今日低開嘅機會唔細。
講番上周五市況，恒指收報22,726點，升196點，成交640億元，內房、水泥股繼續強者愈強，而新股市場亦重現鑊氣，惟收市後輪流發盈警嘅中動向（03818）、霸王（01338）、鞍鋼（00347）同中駿（01966），睇嚟今日都係凶多吉少。
具分拆業務概念
波動市之中，強勢股自然值得留意，但部分具概念嘅股份亦可取。有「小和黃」之稱嘅復星國際（00656），除咗業務遍及多個範疇外，最大賣點係財技了得，繼早前分拆佔47%股權嘅國藥（01099）上市後，最近亦配售部分公眾傳媒股份，而最新消息係指集團好有可能分拆內地最大露天鐵礦海南礦業於A股上市，保守估計資產值有幾百億元。
如果計埋集團早前買入唔少優質嘅海外公司股份，好似Folli Follie咁，集團嘅資產潛在價值絕對唔可以小覷。復星上周五高收6.18元，不妨待其回試6.1元水平小注吸納，先看6.6元，止蝕5.9元。
