短炒倉：暢豐車橋估值吸引

上周五掛牌後股價急升嘅雙樺（01241），尋日回吐逾6%，收報1.47元，不過仍較其招股價1.16元高出26%。講起雙樺，筆者雖然冇入飛認購，但對公司招股時所SELL嘅內地汽車維修市場概念，就頗感興趣。的確，近年內地「汽車下鄉」等一系列補貼政策，除造就了一眾本土汽車生產商外，未來幾年亦將為汽車維修市場帶來龐大客源，按同一邏輯，舊年上市嘅內地中重型卡車零部件供應商暢豐車橋（01039），同樣有留意價值。

重卡零部件需求大

暢豐產品涵蓋所有主要車橋零部件，涉及超過680種型號，去年度來自維修市場的收入，佔總收入比重達66.1%。展望未來幾年，內地大型基建及保障房等項目相繼動工，對中重型卡車需求勢必增加，而且相對於私家車，做「粗重工作」嘅重卡，維修及零部件替換需求更大，故暢豐生意真係唔憂做。集團上市後首份年度業績亦相當對辦，營業額增長64.6%至13.2億元（人民幣．下同），純利增幅更達75.5%，至2.86億元，毛利率由31.4%上升至33.3%，每股盈利0.44元，以昨日收市價3.13港元計，市盈率僅六倍，估值吸引，以八倍PE做目標，睇4.15港元，止蝕2.8港元。

暢豐車橋（01039）

目標價：4.15元 止蝕價：2.80元