花旗楊玉如髮式奇遇

髮型會影響經濟?太子尋日同花旗環球個人銀行服務信用卡及無抵押信貸業務總監伍楊玉如(Maggie)食飯嗰陣,佢講開之前喺風險管理部做總監嗰陣發生嘅趣事。

轉髮型 經濟好轉

話說Maggie以前一直蓄長直頭髮,有日心血來潮電咗個「爆炸裝」,返到公司同事就呆咗,最慘係佢一電完無耐,金融海嘯就殺到嚟。

佢嘅上司行政總裁及總經理盧韋柏(Weber)眼見個市同Maggie個髮型一樣係咁「爆」,即時拎咗一百蚊出嚟,仲叫同事夾錢畀Maggie電番直頭髮,最終Maggie都順應民意,估唔到留番長直髮後,經濟即刻又好轉。

太子尋日見佢又電咗頭髮,Maggie話Weber初時見到都驚驚哋,不過唔知係咪轉咗部門嘅關係,今次輪到花旗嘅信用卡業務「爆數」,單係今年五月嘅零售簽帳額,已經按年多28%。

而俗稱收單業務嘅商戶消費額,更加按年上升36%。

跨媒體地產網新居入伙 幾萬個精選樓盤 歡迎睇樓!

「Money18免費即秒股票報價網站」現推出8升級功能,財經資訊,實時實發!

伍楊玉如話好開心上半年花旗信用卡簽帳額增長,跑贏市場。